Svet Automobila - Makedonija

Нема веќе евтин бензин

Дојде ли крајот на радоста поради ниската цена на горивата? Како што се очекуваше, тие од ноќеска на полноќ пак ќе поскапат.

Регулаторната комисија за енергетика одлучи во наредните две недели бензините да се продаваат поскапо за три, а дизелот за четири денари за литар. Или, новата цена на еуросупер БС-95 ќе изнесува 65 денари, а на еуросупер БС-98 ќе биде 67 денари за литар. Еуродизелот (Д-Е В), пак, ќе чини 55 денари за литар, додека екстра лесното масло за домаќинство за 43,5 денари за литар. Се зголемува и малопродажната цена на мазутот М-1 НС, која ќе изнесува 26,18 денари за килограм.

Претходната корекција на цените беше на 9 февруари, кога беше регистрирано зголемување за три и за 3,5 денари за литар, а дизелот поскапе за 2,5 денари. Тогаш просечната цена на суровата нафта на светските берзи изнесуваше 51,038 долари за барел. 

Најновите ценовни измени се резултат на порастот на светската просечна цена на нафтата, која во изминатите две недели изнесуваше 58,50 долари за барел, што е за 14,6 отсто повеќе од претходно. И цената на бензините во просек беше поголема за 12,8 отсто, а на дизелот за 14,32 отсто. 

И така, додека домашните горива почнаа да одат угоре, по повеќе од шест месеци континуирано намалување, цената на суровата нафта на светските берзи почна повторно да покажува знаци на опаѓање, по благиот пораст од средината на јануари. Според светските агенции, цената на нафтата во вчерашната трговија го продолжи падот од крајот на минатата недела. Така, европската „Брент“ нафта за испорака во април се продаваше за 60,21 долари за барел на лондонската берза што беше за 1 отсто помалку од берзата во Сингапур. Според агенцијата „Блумберг“, северноморската сорта на нафта падна под 60 долари за барел и достигна до 59,79 долари. На њујоршката берза, американската лесна нафта ВТИ, за испорака во април изгуби 20 центи од вредноста и достигна до 50,61 долари за барел. Цената на ВТИ за испорака во март падна за 82 центи и изнесуваше 50,34 долари кон крајот на минатата недела.

Аналитичарите оценуваатт дека растот на цената на нафтата е „надуен“, бидејќи пазарот е прекумерно снабден, а залихите кај најголемиот светски потрошувач, САД, достигнаа рекордно ниво во последните пет недели. Од Голдман и Сакс банката прогнозираат дека трката на пазарот на нафта ќе престане и цените на берзата во Њујорк ќе паднат на 39 долари за барел. Шефот на одделението за истражување на пазарите, Џеф Кари, констатирал дека закрепнувањето на цената во последниот месец било условено со побарувачката на приватните инвеститори, додека во светот се' уште постои вишок на понуда. „Нашата крајна прогноза е 39 долари за барел од типот „лесна“ нафта и 42 за „брент“, посочил Кари. Според Даниел Анг, пак, од компанијата „Филип фјучерс“, растот на цената нема да потрае поради високите резерви на нафта како и зашто производството на тој дериват во САД и натаму преминува 9,2 милиони барели дневно. Цената на нафтата од јуни минатата година досега, изгуби околу 60 отсто од вредноста, поради големите резерви, слабоста на глобалните компании и силниот долар.